बिर्तामोड — २७ माघ २०७८
बिर्तामोड , ‘धान सुपर जोन’ लागू गरेको क्षेत्रमा जथाभावी इँटाभट्टा सञ्चालनको अनुमति दिएको भन्दै जिल्लाका कचनकवल गाउँपालिकाका स्थानीय विरोधमा उत्रिएका छन् । उनीहरूले बर्सेनि खुल्ने इँटाभट्टाले कृषि क्षेत्रको उत्पादकत्व घटाउँदै गएको आरोप लगाएका छन् । इँटाभट्टा सञ्चालनको विरोधमा संघर्ष समिति नै गठन गरी अघि बढेका स्थानीयले बुधबार जिल्ला प्रशासन कार्यालय, घरेलु तथा साना उद्योग कार्यालय र श्रम तथा रोजगार कार्यालयमा ज्ञापनपत्र बुझाएका छन् । उनीहरूले बर्सेनि खुल्ने इँटाभट्टाले गाउँमा प्रदूषण बढाएको, जमिनको उर्वरा शक्तिमा ह्रास आएको, बाटो तथा कल्भर्ट भत्काएको, खेतीयोग्य जमिनको बीचभागमा ठूल्ठूला खाडल खनेको, बालश्रमिक प्रयोग गरेकोलगायतका आरोप लगाएका छन् । प्रचलित कानुनविपरीत हुनेगरी बस्तीनजिकै इँटाभट्टा सञ्चालन गरेको संघर्ष समितिका संयोजक निश्चल दाहालको दाबी छ ।
‘खेतीयोग्य जमिन मासिने गरी इँटाभट्टा सञ्चालनको अनुमति नदिन पटकपटक सम्बन्धित निकायको ध्यानाकर्षण गराउँदासमेत हाम्रो माग सुनुवाइ भइरहेको छैन,’ संयोजक दाहालले भने, ‘यस पटक हामी निर्णायक आन्दोलनमा उत्रिएका छौं । आज (बुधबार) इँटाभट्टा प्रभावित ८ सय ७८ जनाको हस्ताक्षरसहितको ज्ञापनपत्र सम्बन्धित कार्यालयलाई बुझाएका छौं । हाम्रो माग फेरि पनि सुनुवाइ भएन भने हामी सशक्त आन्दोलन गर्न बाध्य हुनेछौं ।’ इँटाभट्टा व्यवसायप्रति आफूहरूको कुनै आपत्ति नभएको तर, इँटाभट्टाले सामाजिक तथा कानुनी रूपमा गर्नुपर्ने न्यूनतम जिम्मेवारीहरूसमेत पूरा नगर्दा आन्दोलित हुनुपरेको उनको भनाइ छ । इँटाभट्टा सञ्चालन ऐनविपरीत हुनेगरी सरकारी निकायले एकदेखि डेढ किलोमिटर क्षेत्रभित्रमा आधा दर्जन इँटाभट्टा सञ्चालनको अनुमति दिएको स्थानीय सोम चम्लागाईले बताए । ‘एकदेखि डेढ किलोमिटर क्षेत्रफलभित्र चार वटा इँटा उद्योगको पाँच वटा चिम्नी सञ्चालित छन्,’ चम्लागार्इंले भने, ‘ती इँटाभट्टाका कारण एक–दुई सय होइन, सयौं घरपरिवार प्रत्यक्ष/अप्रत्यक्ष प्रभावित छन् ।’
( कान्तिपुर दैनिक )