२९ फागुन,काठमाडौँ,-नेपालले तय गरेको यात्रा विश्व क्रिकेट इतिहासकै दुर्लभ ऐतिहासिक पुनरागमन भन्दा हुनेछ । महिना दिन अघिसम्म स्थिति वास्तवमै दयनीय थियो । आईसीसी पुरुष क्रिकेट विश्वकप लिग–२ मा १२ खेल खेल्न बाँकी छँदा नेपालले आफ्नो एकदिवसीय अन्तर्राष्ट्रिय हैसियत बचाउन कठिन देखिएको थियो । तर तिनै १२ मध्ये १० खेल खेलिसक्दा नेपालले चामत्कारिक यात्रा तय गरेको छ– १० मध्ये ९ मा विजयी भएर ।
सोमबार कीर्तिपुरस्थित त्रिवि क्रिकेट मैदानमा यूएईमाथि १ सय ७७ रनको एकपक्षीय जित निकाल्यो । त्यसको अर्थ नेपालले कम्तीमा आफ्नो एकदिवसीय अन्तर्राष्ट्रिय मान्यता मात्र जोगाएको छैन, अब त्यसमै टिकेर अर्को ठूलो उपलब्धि पनि हात पार्न सक्नेछ । त्यो भनेको आफूले खेल्न बाँकी २ खेलमा पनि विजयी बनेर एकदिवसीय विश्वकपको अन्तिम छनोटमा प्रवेश । नेपालले समातेको लयलाई आधार मान्ने हो भने त्यो पूरापूर सम्भव देखिन्छ ।
यूएई भने ७ टिमसम्मिलित लिग २ को अन्तिम दुई स्थानमा रहने निश्चित भएको छ । प्रतियोगिताका बाँकी खेलमा जस्तोसुकै नतिजा आए पनि यूएईको स्थिति फेरिने छैन । टोलीले आफ्नो एकदिवसीय अन्तर्राष्ट्रिय मान्यता गुमाएको छ ।
लगातार खराब प्रदर्शन गरिरहेको यूएईको ३४ खेलमा ३१ अंक छ । उसको अगाडि अमेरिका ३५ अंकसहित पाँचौं स्थानमा छ । नेपाल भने अमेरिकालाई पनि उछिनेर ३६ अंक बुटल्दै चौथो स्थानमा पुगेको छ । अब नेपालको लक्ष्य भनेको तेस्रो स्थानमा उक्लनका लागि ४ अंक बटुल्ने हुनेछ । नामिबिया ३९ अंकसहित तत्कालका लागि तेस्रो स्थानमा छ । स्कटल्यान्ड र ओमान यसअघि नै शीर्ष दुईमा रहने निश्चित हुँदै एकदिवसीय विश्वकप छनोटका लागि योग्य भइसकेका छन् । नेपालको पछिल्लो जितका कारण अमेरिका जोगिएको छ र उसको एकदिवसीय अन्तर्राष्ट्रिय मान्यता कायम रहने भएको छ । पपुवा न्युगिनी भने ११ अंक लिएर पुछारमा छ ।
आइतबार टस जितेर पहिले ब्याटिङ गर्ने निर्णय लिएको नेपालको सुरुआत भने कमजोर रह्यो । २२ रन बनाउँदासम्म ३ विकेट गुमिसकेको थियो । त्यसपछि भने रोहित पौडेलले कप्तानी इनिङ्स खेलेर दुई महत्त्वपूर्ण साझेदारी गरे । भीम सार्कीसँग चौथो विकेटका लागि ५४ रनको साझेदारी । भीमले ४ चौकाको मदतमा २९ रन बनाए । उनी आउट भएपछि रोहितले आरिफ शेखसँग थप ८६ रनको साझेदारी गरे । र, नेपाललाई बलियो स्थितिमा पुर्याए । आरिफले ५ चौका प्रहार गरेर ४३ रन बनाए । रोहित आफैंले १ सय १२ बल खेल्दै ७७ रन जोडेका थिए । त्यसमा ९ चौका सामेल थियो । त्यसै प्रदर्शनका लागि उनी प्लेयर अफ द म्याच पनि भए ।
खेलपछि उनले आफ्नो प्रदर्शनलाई महत्त्वका आधारमा अहिलेसम्मकै उच्च रहेको बताए । भने, ‘जितमा सबै खुसी छौं, खेल अद्वितीय रह्यो ।’ इनिङ्सको अन्त्यतिर गुलसन झा र दीपेन्द्रसिंह ऐरीले आक्रामक ब्याटिङ प्रस्तुत गरेका थिए । गुलसनले ३२ बलमा ३७ रन बनाए– एक चौका र तीन छक्काका साथ । दीपेन्द्रले १९ बलमा ३४ रन । त्यसमा तीन चौका र दुई छक्का सामेल थियो ।
यस्तोमा नेपाल कमजोर सुरुआत बिर्सेर ४९.२ ओभरमा अलआउट हुँदै २ सय ४८ रन बनाउन सफल रह्यो । यूएईका कप्तान मोहम्मद वासिमले पनि माने– रोहित र भीमको महत्त्वपूर्ण साझेदारीले खेल नेपालको पक्षमा मोडिएको । उनले थपे, ‘अन्यथा हामीले राम्रो सुरुआत गरेको थियौं ।’
ललितको ५ विकेट
आक्रामक बलिङ गरेका ललित राजवंशी खेलमा पूरै छाए । यसक्रममा ७.५ ओभरमा २० रनमात्र खर्चेर ५ विकेट लिए । नेपालका सबै बलर खाली हात रहेनन् । सन्दीप लामिछानेले २, सोमपाल कामी, दीपेन्द्रसिंह ऐरी र गुलसनले समान एक/एक विकेट लिए । ललितले पहिलो ओभरको पाँचौं बलमै वृत्य अरविन्दलाई आकर्षक ढंगमा बोल्ड गरे । त्यसपछि यूएईको ब्याटिङक्रम तासको पत्तीझैं ढल्न थाल्यो । यूएईका लागि आयन अफजल खानको २९ रन नै व्यक्तिगत ठूलो स्कोर रह्यो ।
कप्तान रोहितले ललित नै खेलको वास्तविक उत्कृष्ट खेलाडी रहेको भन्दै प्रशंसा गरे । भने, ‘म प्लेयर अफ म्याचको अवार्ड ललितसँग साझेदारी गर्न चाहन्छु, उनले निकै सटीक बलिङ गरे ।’ यूएई टिम २२.५ ओभर मात्र टिक्यो र जम्माजम्मी ७१ रन मात्र निकाल्न सक्यो । खेल टुंगिँदा नेपाली खेलाडीको खुसी देखिनसक्नु थियो, त्यहीं यूएईका खेलाडी निराश थिए । तिनको अनुहार मलिन थियो ।
समाचार आजको कान्तिपुर राष्ट्रिय दैनिकमा प्रकाशित छ।