काठमाडौँ — ०५ फागुन २०७८
काठमाडौँ , लिनिङ ११ औं पुष्पलाल स्मृति र्याङकिङ राष्ट्रिय ब्याडमिन्टन प्रतियोगिताको पुरुष एकल (शीर्ष १६ वरीयता) को क्वाटरफाइनलमा समूह ‘ए’ बाट एपीएफका दीपेश धामी र आर्मीका प्रफुल महर्जन तथा समूह ‘बी’ बाट आर्मीका नवीन श्रेष्ठ र पुलिसका जीवन आचार्य पुगेका छन् । समूह ‘सी’ बाट एपीएफका विजित थापामगर र धातुका सुदीप सेढाईं तथा समूह ‘डी’ बाट रिभाइभका प्रिन्स दाहाल र आर्मीका रुकेश महर्जन अन्तिम आठमा पुगेका छन् । लिगको अन्तिम खेलमा समूह ‘ए’ तर्फ प्रफुलले बाँकेका इरफान अन्सारीलाई २१–१७, २१–६ ले हराए । प्रफुलले विजितसँगको प्रतिस्पर्धा पक्का गरे । दीपेशले पुलिसका सुनील जोशीलाई २१–१२, २१–१४ हराए । तीनै खेलमा जित निकालेका दीपेशले सेमिफाइनल पुग्न सुदीप सेढाईंसँग प्रतिस्पर्धा गर्नेछन् ।
आर्मीका नवीनले एपीएफका देवराज रानालाई २१–९, २१–११ ले हराए । समूहका सबै जितेका नवीनले आर्मीका रूकेश महर्जनसँग प्रतिस्पर्धा गर्नेछन् । पुलिसका जीवनले एपीएफका साजनकृष्ण ताम्राकारलाई २०–२२, २१–८, २१–१३ ले हराए । अब जीवनको प्रतिस्पर्धा प्रिन्स दाहालसँग हुनेछ । पुलिसका दीपक बोहराले एपीएफका विजितलाई २४–२२, २१–१५ ले पराजित गरे । धातुका सुदीपले बाँकेका विलाल वार्सीलाई २१–६, २१–७ ले पन्छाए । सुदीप र दीपकको अंक पनि बराबर भए पनि हेड टु हेडका आधारमा सुदीप क्वाटरफाइनल पुगे ।
( कान्तिपुर दैनिक )