काठमाडौँ — १७ माघ २०७८
काठमाडौँ , अञ्जन विष्टले ठीक भनेका थिए, नेपाली राष्ट्रिय टिमका लागि सर्वाधिक १३ गोलको कीर्तिमान जस्ताको तस्तै रहेको धेरै वर्ष भयो, त्यसलाई तोडिनुपर्छ । मालेमा भएको साफ च्याम्पिनसिपमा श्रीलंकाविरुद्धको खेलमा नेपालले निकालेको जितपछि अञ्जन यस्तो भन्दै थिए । अनि उनी त्यत्तिकैमा रोकिएनन्, थपे, ‘नेपालका लागि १३ गोलको कीर्तिमान तोड्ने लक्ष्य पनि छ ।’ अञ्जनले पछि बंगलादेशविरुद्ध पनि पेनाल्टीबाट गोल गरे । नेपालका लागि उनको व्यक्तिगत गोल संख्या पुगिसकेको छ, सात । उनको यो सातौं गोल नेपाली फुटबल इतिहासकै सर्वाधिक महत्त्वपूर्ण हो, अत्यधिक दबाब र तनावमा गरिएको गोल हो । यिनै अञ्जनले निकालेको मीठो पासमा विमल घर्तीमगरले मोरिससविरुद्ध पहिलो मैत्रीपूर्ण अन्तर्राष्ट्रिय खेलमा गोल गरे । त्यो उनको नवौं गोल थियो । केही महिना अगाडिसम्म पनि लागिरहेको थियो, सायद विमलले दोहोर्याएर नेपालका लागि खेल्ने छैनन् ।
दुई दशक छुन लागेको कीर्तिमान
सम्भावना विमल र अञ्जनकै
विमल र अञ्जन सायद आफ्नो सक्रिय खेल जीवनको मध्यभागमा मात्र पुगेका छन् । सबै स्थिति अनुकूल रहने हो भने नेपालकै लागि उनीहरूको खेल जीवन अझै मज्जाले राम्रै समय चल्नेछ । त्यसैले पनि नजर यिनै दुई खेलाडीमा रहेको हो । विमलले नेपालका लागि सन् २०१२ मै डेब्यु गरेका थिए, यो पनि आफैंमा १० वर्ष भइसकेको छ । जति बेला उनले नेपालका लागि पहिलोपल्ट खेले, भर्खर भर्खर किशोर उमेरमा पुगेका थिए । यसबीच उनले खालि ३६ खेलमा नौ गोल गरिसके । उनले सबैभन्दा पहिले साफ च्याम्पियनसिपमा पाकिस्तानविरुद्ध गोल गरेका थिए, सन् २०१३ मा । उनको दोस्रो गोल सन् २०१५ मा केरलामा सम्भव भएको थियो, भारतविरुद्ध । सन् २०१६ मा बंगबन्धु गोल्डकपमा उनले श्रीलंकाविरुद्ध तेस्रो गोल निकाले । चौथो गोल ब्रुनाइविरुद्ध एएफसी सोलिडारिटी कपमा सम्भव भएको थियो र वर्ष थियो, सन् २०१६ मा । त्यही प्रतियोगितामा उनले लाओसविरुद्ध पनि गोल गरे, यो उनको पाँचौं गोल रह्यो । सन् २०१७ को एसिया कप छनोटमा विमलले ताजकिस्तानविरुद्ध आफ्नो छैटौं गोल गरे । सन् २०१८ को साफ च्याम्पियनसिपमा उनले दुई गोल गरे, पाकिस्तान र बंगलादेशविरुद्ध र पुगेको थियो, आठ गोल ।
त्यसपछि उनको व्यक्तिगत जीवनदेखि खेलाडी जीवनसम्म धेरै उतारचढाव आए । अञ्जनले पनि यसबीच यस्तै उतारचढावको यात्रा तय गरे । उनले नेपालका लागि विमलभन्दा धेरै क्याप जितिसकेका छन्, भलै उनको डेब्यु सन् २०१४ मा भएको थियो । अनि विमलले आठ गोल गरिसकेपछि मात्र अञ्जनको गोलको खाता खुलेको थियो । अञ्जनले पहिलो गोल भने सन् २०१९ मा गरेका हुन्, नेपालका लागि खेलेको पाँच वर्षपछि । अवसर थियो, विश्वकप छनोट र विपक्षी टिम थियो, चिनिया ताइपेई । त्यसमा उनले एक होइन, दुई गोल गरे । अञ्जनको तेस्रो गोल इराकविरुद्ध रह्यो, सन् २०२१ मा । त्यही वर्ष उनले विश्वकप छनोटमै चिनियाँ ताइपेईविरुद्ध आफ्नो चौथो गोल पनि गरे । अञ्जनको पाँचौं गोल सन् २०२१ मै भारतविरुद्ध रह्यो, मैत्रीपूर्ण खेलमा । अनि छैटौं र सातौं गोल मालेमै भए । विमल र अञ्जनले बीचमा केही खेल नगुमाएको भए, अझै धेरै गोल गर्न सक्थे कि ? विशेषतः विमलले । सबैलाई थाहा छ, आम मान्छेको जीवनमा त ‘यदि र तर’ हुन्न भने खेलाडी जीवनमा यस्तो सुविधा कसरी हुन सक्छ र ? तर भविष्य भने आफ्नो हातमा हुन सक्छ । विश्वास गरौं, विमल र अञ्जनले ठीक बाटो रोज्नेछन् र यीमध्ये कसैले नेपालका लागि गोलको नयाँ कीर्तिमान राख्नेछन् ।
( कान्तिपुर दैनिक )