काठमाडौँ — १६ माघ २०७८
काठमाडौँ , यू–१६ टिममा छँदै चर्चित भएका विमल घर्तीमगर युरोपेली क्लबमा सबैभन्दा बढी अवसर पाएका नेपाली फुटबलर हुन् । तर, उनका लागि पछिल्ला तीन वर्ष निकै खराब रह्यो । नाइट क्लब काण्डको कारण थिम्पु उड्नु केही घन्टाअघि मात्रै राष्ट्रिय टिमबाट निकालिए । निलम्बनमा पनि बेहोरे । मैदानमा फर्केपछि चोटले सतायो । घुँडाको शल्यक्रिया नै गर्नुपर्यो । धेरैले सोध्न थाले, उनको करिअर नै संकटामा परेको त होइन ? दायाँ घुँडाको शल्यक्रिया गरेपछि साँच्चै विमल फेरि लयमा फर्किेनमा शंका बढ्न थालेको थियो । तर, लिग च्याम्पियन मछिन्द्रमा आबद्ध हुँदै उनी मैदानमा फर्किए । सुरु–सुरुमा अन्त्यतिर मैदानमा प्रवेश गरेका उनमा आत्मविश्वास बढ्दै गयो । पछिल्ला खेलहरूमा सुधारिएको प्रदर्शन गर्दै पहिलो रोजाइमै खेल्न थाले । यसबीच उनलाई राष्ट्रिय टिमका प्रशिक्षक अब्दुल्लाह अल्मुताइरीले पनि विश्वास गरे । मोरिससविरुद्धको दुई मैत्रीपूर्ण खेलमध्ये शनिबार दशरथ रंगशालामा भएको पहिलो खेलमा विमलले पहिलो रोजाइमै खेल्ने मौका पाए ।
फिफा वरीयतामा तीन स्थानमुनिको टिमविरुद्ध नेपालले १–० को जित निकाल्यो । यसमा एकमात्र गोल विमलले नै गरे । उनले अञ्जन विष्टको चलाखीपूर्ण पासमा ५५ औं मिनेटमा प्रहार गरेको बलले पोस्ट छुँदै जालीको सम्पर्कमा पुगेको थियो । त्यो ‘मुभ’मा बल पाउनुअघि नै विमलको दौडाइमै गोल गर्नसक्ने आत्मविश्वास बुझ्न सकिन्थ्यो । राष्ट्रिय टिममा २७ महिनापछि फर्किएका उनले नेपाललका लागि तीन वर्षयता पहिलो गोल गरेका हुन् । त्यसैले हुनसक्छ, उनले गोलको खुसीयाली पनि उस्तै बेजोड तरिकाले मनाए । म्यानमारविरुद्ध ३–० ले हारेको (मान्डलय/२०७६ कात्तिक २१) मैत्रीपूर्ण खेलयता विमल पहिलोपल्ट राष्ट्रिय टिमबाट खेलेका हुन् । त्यसयता प्रतिबन्ध र चोटको चपेटामा परे । उनले साफ च्याम्पियनसिपमा बंगलादेशविरुद्ध २–० को जितमा एक गोल (ढाका/२०७५ भदौ २३) गरेका थिए । त्यसयता उनले राष्ट्रिय टिमका लागि पहिलो गोल गरेका हुन् ।
उनको नवौं अन्तर्राष्ट्रिय गोल पनि हो यो । साफ यू–१९, दक्षिण एसियाली खेलकुद (यू–२३), बंगबन्धु गोल्डकप र सोलिडारिटी कप जितेका उनले क्लब र देशका लागि पुनरागमनसँगै गोल यी फरवार्डले फेरि राम्रो लय समात्ने संकेत देखाएको छ । ‘विमलका लागि यो गोल महत्त्वपूर्ण हो,’ प्रशिक्षक अल्मुताइरीले भने, ‘तर, हामीलाई यत्तिले मात्रै पुग्दैन । त्यसैले विमल अगाडि बढ्नुपर्छ । उनीसँगै धेरै अपेक्षा गरेका छौं । उनले थप मिहिनेत गरेर देशका लागि राम्रो प्रदर्शन गर्नुपर्छ ।’ उनले थपे, ‘विमल टिमका प्रत्येक सदस्यजस्तै महत्त्वपूर्ण छन् । विमल २३ खेलाडी, ३४ खेलाडी, सयौं खेलाडी र हजार खेलाडीमध्ये एक अर्का खेलाडी हुन् ।’ उनले मोरिससविरुद्ध दुई खेलका लागि ३४ खेलाडीको दुई टिम बनाएका छन् । यसमा विमल दुवै खेलका लागि समावेश गरिएका १२ खेलाडीमा परेका छन् । त्यसैले विमलले मंगलबार पनि मौका पाउन सक्छन् ।
तीनको पुनरागमन, दुईको डेब्यु
विमलसँगै मिडफिल्डर जगजित श्रेष्ठ र डिफेन्डर देवेन्द्र तामाङले पनि मोरिससविरुद्धको खेलमार्फत् राष्ट्रिय टिममा पुनरागमन गरेका छन् । मछिन्द्रका देवेन्द्र करिब दुई वर्षपछि फर्किएका हुन् । अस्ट्रेलिया बसोबास गरिरहेका जगजितले झन्डै सात वर्षपछि नेपाली टिममा अवसर पाएका हुन् । उनी यही सिजन लिगमा आर्मीबाट खेल्न आइपुगेका हुन् । नेपाली राष्ट्रिय टिमले औपचारिक खेलमा सामना गरेको पहिलो अफ्रिकी प्रतिस्पर्धी हो मोरिसस । अन्तर्राष्ट्रिय फुटबलमा २७ महिनापछि फर्किएको पूर्वी अफ्रिकीको टिमविरुद्ध मैदानमा ओर्लिंदै डिफेन्डर सुदीप गुरुङ र मिडफिल्डर आकाश बुढामगरले राष्ट्रिय टिममा डेब्यु गरेका छन् । यी दुवै सातदोबाटो युवा क्लबका खेलाडी हुन् । सुदीपले ८५ औं मिनेटमा सुरजज्यू ठकुरीको स्थान लिएका थिएका थिए भने आकाशले तीन मिनेटको इन्ज्युरी समयको पहिलो मिनटमा तेज तामाङको स्थानमा खेल्ने मैदानमा प्रवेश गर्ने अवसर पाएका थिए ।
औसत खेल
कोभिड–१९ को महामारीमा एकतिहाइ (५ हजार) दर्शक प्रवेश दिइएको दशरथ रंगशालामा घरेलु टिमले मोरिससलाई १–० ले पराजित गर्दै स्वास्थ्य चुनौती मोलेर टिमको समर्थन गर्न आएका दर्शकलाई खुसी त पार्यो । भुटानलाई पराजित गरेपछि मैत्रीपूर्ण खेलमा नेपालले एक दशकयता जित पनि हासिल गर्यो । तर, तीन महिनाअघि साफ च्याम्पियनसिपको फाइनल खेलेको टिमको प्रदर्शन भने उत्कृष्ट रहेन । साफको फाइनलमा भारतविरुद्ध ३–० ले हारेयता नेपाली टिम पहिलोपल्ट मैदानमा उत्रिएको हो । अञ्जन आठौं मिनेटमै बललाई पोस्टको दिशा दिन चुके । विमलले २७ औं मिनेटमा अन्जनलाई दिनुपर्ने बल आफैंले गोलकिपर केभिन जिन–लुइसको हातमा दिए । नेपाली टिमका कप्तान किरण चेम्जोङ भने निकै आत्मविश्वासी देखिए । उनले केही राम्रा बचाउ गरे । स्टेभेन एस्लीको पासमा एड्रियन फ्रान्कोइसले ३५ औं मिनेटमा ‘फस्ट बार’ मा प्रहार गरेको बल किरणले नियन्त्रणमा लिए । पहिलो हाफको इन्ज्युरी समयमा दिनेश राजवंशीले उपलब्ध गराएको बलमा अञ्जनले अगाडि गोलकिपरमात्रै हुँदा ‘सिक्स यार्ड बक्स’ नजिकबाट ‘सेकेन्ड बार’ च्याप्दै प्रहार गरेका थिए ।
तर, बल पोस्टबाहिर गयो र नेपालले पहिलो हाफमै अग्रता लिने सबैभन्दा राम्रो अवसर पनि गुमाएको थियो । पाहुना टिमको प्रदर्शन खासै गतिलो भएन । तर, ४७ औं मिनेटमा अग्रतानजिक पुगेको थियो । फर्नान्डो ज्याक्सनले ‘१८ यार्ड लाइन’ बाट प्रहार गरेको बल पोलमा लागेर फर्किंदा मोरिसस अग्रता लिन चुकेको थियो । त्यसपछि ५५ औं मिनेटमा विमलले नेपालले अग्रता दिलाए । स्टेभेनले ६५ औं मिनेटमा टाढैबाट हानेको बल नियन्त्रण गर्न किरणलाई गाह्रै परेको थियो । जगजितको कर्नरमा ७५ औंमिनेटमा अञ्जनले हेडद्वारा प्रहार गरेको बल बारमा लाग्दै फर्केको थियो । अञ्जनले ७७ औं मिनेटमा हानेको बल पनि बारमा लागेर फर्कियो । त्यसलाई मोरिससका डिफेन्सले क्लियर गर्न सकेनन्, जसमा जगजितले गरेको हेडरमा गोलकिपर केभिनले उत्कृष्ट बचाउ गर्दै बल बाहिर फालिदिए ।
( कान्तिपुर दैनिक )