प्रतिनिधिसभाको तीन क्षेत्रमा हुन लागेको उपनिर्वाचनलाई दलहरूले प्रतिष्ठाको विषय बनाएका छन् । उपनिर्वाचनको तरंगले काठमाडौंलाई समेत तताएको छ ।
पार्टी गठनको छोटो समयमै आमनिर्वाचनमा होमिएर उल्लेख्य सिट जितेपछि रास्वपाले राष्ट्रिय राजनीतिमै हलचल पैदा गराएको थियो । यसबीच संसद् र सरकारमा समेत सहभागी भएको रास्वपाको जनाधार मापन गर्ने आधारका रूपमा चितवन–२ को निर्वाचनलाई हेरिएको छ । रास्वपा सभापति रवि लामिछानेको नागरिकता विवादमा सांसद पद खारेज भएपछि चितवन–२ रिक्त भएको हो । कांग्रेस र एमालेले लामिछानेसँग यसअघि प्रतिस्पर्धा गरेका उम्मेदवारलाई टिकट नदिएर नयाँ अनुहारलाई अघि सारेका छन् । कांग्रेसले पूर्वजिल्ला सभापति जितनारायण श्रेष्ठ र एमालेले रामप्रसाद न्यौपानेलाई उम्मेदवार बनाएका छन् । यसअघि कांग्रेसबाट उमेश श्रेष्ठ र एमालेबाट कृष्णभक्त पोखरेल प्रतिस्पर्धामा थिए ।
बारा–२ को निर्वाचनलाई समग्र मधेश राजनीतिको शक्तिसंघर्षको विषय बनाइएको छ । मधेशको राजनीतिमा मुख्य नेता को हुने भन्नेमा जसपा अध्यक्ष उपेन्द्र यादव र जनमत पार्टीका अध्यक्ष सीके राउतबीच प्रतिस्पर्धा छ । चार महिनाअघि सप्तरी–२ मा राउतसँग चुनाव हारेका यादवको उम्मेदवारीलाई सत्ता गठबन्धनका मुख्य दलको समर्थन छ । सत्ता गठबनन्धनमै रहेका राउतले भने माओवादी नेता शिवचन्द्र कुशवाहालाई पार्टी प्रवेश गराएर यादवविरुद्ध उम्मेदवार बनाएका छन् ।
समाचार आजको कान्तिपुर राष्ट्रिय दैनिकमा प्रकाशित छ।