पर्वत। फागुन १
हिमालयदेखि महासागरसम्मको प्रकृति, मानवता र आत्मचेतनाको एकरूपतालाई पुस्तकमार्फत समाजसँग जोड्ने उद्देश्यसहित अघि बढाइएको ‘हिमालय टु ओसयिनन नेपाल किताब यात्रा’ पर्वतको पाङ पुगेको छ । तराईमा दाङ, पहाडमा पाङको रुपमा प्रख्याती पाएको यो स्थानबाट धौलागिरी हिमश्रृंखला प्रस्ट देखिन्छ । त्यतिमात्र होइन, कालीगन्डकीको किनारमा रहेको यो प्वाइन्टबाट बाग्लुङ बजारको एरियल भ्यु पनि देखिन्छ । पर्यटकीय नगरी पोखराबाट सुरु भएको सिलवालको नेपाल किताब यात्रा पर्वत हुँदै अन्य जिल्लाहरुमा क्रमशः अगाडि बढ्नेछ ।
यो किताब यात्रामा अशोकका तीन कृतिहरू ‘एभरेस्टः एन अनफिनिस्ड स्टोरी’, ‘अप्प दीपो भवः’ र ‘श्रीलंका स्मृति’ समेटिएका छन् ।
‘एभरेस्टः एन अनफिनिस्ड स्टोरी’ले सगरमाथाको प्रतीकात्मक यात्रामार्फत बाह्य उचाइभन्दा भित्री जीवनयात्रा र आत्मपहिचानको सन्देश दिन्छ ।
‘अप्प दीपो भवः’ तीर्थहरुको पनि तीर्थ अर्थात् महातीर्थ मानिने कैलाश–मानसरोवर यात्राका आध्यात्मिक अनुभूतिहरूलाई समेट्दै ‘आफ्नो उज्यालो आफैं बाल्ने’ जीवनदर्शन प्रस्तुत गर्ने कृति हो ।
‘श्रीलंका स्मृति’ हिमालयमा जन्मिएको यात्रीले महासागरको भूगोलसम्म पुग्दा अनुभूत गरेको प्रकृतिको एकरूपता र मानवताको साझा भावनालाई अभिव्यक्त गर्ने कृति हो ।
लाङटाङ सद्भावना दूत समेत रहेका लेखक सिलवालका अनुसार ‘हिमालय टु ओसियन नेपाल किताब यात्रा’को मूल उद्देश्य मानिसलाई प्रकृतिसँग जोड्नु, आत्मचेतनातर्फ फर्काउनु तथा विश्व मानवताको साझा भाव फैलाउनु हो । यसअघि विद्यालयकेन्द्रित यो किताब यात्रा अब विद्यालय मात्र नभई समाजका विभिन्न तहसम्म विस्तार गर्दै नेपालका सबै ७७ जिल्लामा पुर्याउने लक्ष्य राखिएको उनले बताए ।