काठमाडौँ — २० माघ २०७८
काठमाडौँ , नेपाल टेलिकमका ग्राहकले अर्को सेवा प्रदायकको नेटवर्कमा भ्वाइस कल गर्दा वा एसएमएस पठाउँदा अब कम शुल्क लाग्ने भएको छ । नेपाल दूरसञ्चार प्राधिकरणले मंगलबारबाट लागू गरेको ‘अन्तरआबद्धता निर्देशिका २०७६’ मा एउटा सेवा प्रदायकको नेटवर्कका ग्राहकले अर्को नेटवर्कका ग्राहकलाई कल गर्दा लाग्ने शुल्क परिमार्जन गरिएको छ । टेलिकमका अनुसार अब कम्पनीको तारवाला फोनबाट अर्को सेवा प्रदायकको मोबाइलमा कल गर्दा प्रतिमिनेट एक रुपैयाँ १० पैसा लाग्नेछ । कम्पनीको जीएसएम, सीडीएमए र सी–फोन पोस्टपेडबाट अर्को सेवा प्रदायकको नेटवर्कमा कल गर्दा प्रतिमिनेट एक रुपैयाँ ८ पैसा लाग्नेछ । जीएसएम, सीडीएमए र सी–फोन प्रिपेड सेवाबाट अर्को सेवा प्रदायकको नेटवर्कमा कल गर्दा प्रतिमिनेट एक रुपैयाँ ६२ पैसा लाग्ने टेलिकममा प्रवक्ता राजेश जोशीले जानकारी दिए ।
२०७६ चैतबाट लागू गर्ने भनिएको टेलिकम कम्पनीहरूको अन्तरआबद्धता शुल्क झन्डै २ वर्षपछि मात्रै कार्यान्वयनमा आएको हो । सेवा प्रदायकले पटक–पटक समय माग गर्दै आएका कारण मिति सर्दै आएको थियो ।
( कान्तिपुर दैनिक )