मुगु र हुम्ला — २५ पुस २०७८
मुगु र हुम्ला, नेपालगन्जमा बिहानैदेखि बाक्लो हुस्सु लाग्न थालेपछि कर्णालीका हिमाली जिल्लाहरूमा हवाई सेवा ठप्प हुन थालेको छ । नेपालगन्ज विमानस्थलबाट मुगु र हुम्लासहित जुम्ला, डोल्पा र बाजुराको कोल्टीमा प्रतिदिन ५ देखि ७ वटा उडान हुने गरेकामा अहिले हुस्सुले एउटा उडान गर्न पनि समस्या हुन थालेको छ । हवाई उडान कम हुन थालेपछि विमानस्थलमा यात्रु अलपत्र पर्न थालेका छन् । नेपालगन्जमा बाक्लो हुस्सु लाग्दा एक सातादेखि उडान प्रभावित भएको रारा विमानस्थल प्रमुख विशाल बरुणले बताए । ‘साताअघि ५/७ वटा उडान हुन्थे,’ उनले भने, ‘अहिले नेपालगन्ज र सुर्खेत जाने यात्रुहरू सदरमुकाममै अलपत्र छन्, हिउँ खेल्न रारा आउने यात्रुलाई पनि मुगु भित्रिन समस्या भयो ।’
नेपालगन्जमा बिहानैदेखि झन्डै १/२ बजेसम्म हुस्सु लाग्ने र त्यहाँ मौसम खुल्दा मुगुमा हावा चल्ने भएकाले उडान ठप्प भएका हुन् । नेपालगन्जमा बाक्लो हुस्सु लाग्दा सडक सुविधा नपुगेको हुम्लामा पनि उडान गर्न समस्या भएको छ । अहिले एउटा उडान गर्न पनि मुस्किल भएको सिमकोट विमानस्थल प्रमुख मोहन गिरीले जानकारी दिए । हुम्लामा झन्डै एक सय यात्रु जहाजको प्रतीक्षामा रहेको उनको भनाइ छ । नेपालगन्ज विमानस्थलमा पनि कर्णालीका हिमाली जिल्लामा जाने यात्रुको चाप छ । जिल्ला अस्पतालले रिफर गरेका बिरामीलाई पनि समयमै नेपालगन्ज र सुर्खेतका ठूला अस्पतालमा पुर्याउन समस्या भएको छ ।
( कान्तिपुर दैनिक )
