लमजुङ । विद्यार्थी राजनीतिबाट आफ्नो राजनीतिक यात्रा सुरु गरेका पौडेल नेपाली कांग्रेसको आगामी महाधिवेशनमा महाधिवेशन प्रतिनिधिका रूपमा अघि बढ्ने तयारीमा छन्।
२०६२ सालमा गोरखा क्याम्पसबाट विद्यार्थी राजनीति सुरु गरेका पौडेलले त्यसयता संगठनको विभिन्न जिम्मेवारी सम्हाल्दै आएका छन्। २०६२ सालमै स्ववियु सदस्य बनेका उनी २०६४ सालमा गोरखा क्याम्पस नेविसंघ इकाइ सभापति बने। २०६५ सालमा नेविसंघका तर्फबाट स्ववियु सभापतिको उम्मेदवार बनेका पौडेलले नेविसंघ गोरखा जिल्ला सदस्यको जिम्मेवारीसमेत सम्हाले।
त्यसपछि २०७२ सालमा नेविसंघ लमजुङ जिल्ला सचिव बनेका पौडेल विद्यार्थी संगठनमा आफ्नो सक्रियता कायम राख्दै अघि बढे। २०७८ सालमा नेपाली कांग्रेस राइनास कार्यसमिति सभापति बनेपछि उनको राजनीतिक भूमिका स्थानीय तहको पार्टी नेतृत्वमा केन्द्रित भयो।
लामो राजनीतिक अनुभवसँगै पौडेलको प्रभावकारी वाक्कला, तर्कसहित आफ्नो धारणा राख्ने क्षमता र सहज व्यवहार उनको राजनीतिक पहिचानका प्रमुख पक्षका रूपमा लिइन्छ। सार्वजनिक तथा राजनीतिक कार्यक्रममा विषयवस्तुलाई स्पष्ट रूपमा प्रस्तुत गर्ने शैलीका कारण उनी कार्यकर्तामाझ परिचित छन्।
राजनीतिसँगै पौडेल कृषि तथा मौरीपालन व्यवसायमा समेत सक्रिय छन्। स्थानीय सामाजिक गतिविधिमा सहभागिता जनाउँदै आएका उनले आवश्यकता पर्दा राजनीतिक आस्था र विभेदभन्दा माथि उठेर सहयोग गर्ने गरेको उनका समर्थकहरूको भनाइ छ।
सरल जीवनशैली, सबैसँग सहज सम्बन्ध र राजनीतिक मतभिन्नतालाई व्यक्तिगत सम्बन्धमा हावी हुन नदिने व्यवहार पौडेलको अर्को परिचयका रूपमा प्रस्तुत गरिन्छ। यही कारण कांग्रेसको संगठनभित्र मात्र नभई स्थानीय सामाजिक तथा राजनीतिक वृत्तमा समेत उनीबारे चर्चा हुने गरेको बताइन्छ।
विद्यार्थी राजनीतिदेखि पार्टीको स्थानीय नेतृत्वसम्मको लामो अनुभव बोकेका पौडेल अहिले महाधिवेशन प्रतिनिधिका रूपमा अघि बढ्ने तयारीमा छन्। संगठनमा गरेको काम, नेतृत्वको अनुभव र कार्यकर्तासँगको निरन्तर सम्पर्कलाई आधार बनाउँदै उनले आफ्नो राजनीतिक यात्रालाई थप अगाडि बढाउने तयारी गरेको बताइएको छ।