काठमाडौं – नेपाल महिला चेम्बरले सुशीला आर्ट एकेडेमीसँगको सहकार्यमा तेस्रो चरणको ‘रिदम एण्ड सोल’ कार्यक्रम आयोजना गरेको छ । कमलपोखरी स्थित रुसी सांस्कृतिक केन्द्रमा आयोजित ‘रिदम एण्ड सोल’ कार्यक्रममाझ प्रस्तुत पूर्वी र पश्चिमी नृत्य र सांगीतिक कलाले अद्वितीय सांस्कृतिक विविधता झल्काएको थियो । जसमा सुशीला आर्ट एकेडेमीका कलाकारहरूले कला र सांस्कृतिक प्रस्तुतिको उत्कृष्ट प्रदर्शन, भावपूर्ण क्षणहरू र जीवन्त मनोरन्जनको मिश्रणसहित दर्शकहरूलाई मोहित पार्नुभएको थियो।
सो अवसरमा नेपाल चेम्बर अफ कमर्शका अध्यक्ष कमलेश कुमार अग्रवालले नेपाल महिला चेम्बरकी अध्यक्ष उर्मिला श्रेष्ठको गतिशील नेतृत्वमा महिला चेम्बरले असाधारण काम गर्दै आएको चर्चा गर्दै आभार व्यक्त गर्नुभयो । उहाँले महिला उद्यमशीलता र सशक्तीकरणका लागि महिला चेम्बरले गर्दै आएको निरन्तर प्रयासको मुक्तकण्ठले प्रशंसा समेत गर्नुभयो।
कार्यक्रममा नेपाल महिला चेम्बरकी अध्यक्ष एवं नेपाल चेम्बर अफ कमर्सकी उपाध्यक्ष उर्मिला श्रेष्ठले महिला उद्यमशीलताको अभिवृद्धि र विकासका लागि सो कार्यक्रम कार्यक्रम आयोजना गरिएको बताउनुभयो ।साथै उहाँले महिला सशक्तिकरणको उदेश्यसहित कार्यक्रम आयोजना गरिएको जानकारी समेत दिनुभयो ।
सुशील आर्ट एकेडेमीकी अध्यक्ष युलिया कोइरालाले सहजीकरण गर्नुभएको उक्त कार्यक्रमको संचालन नेपाल चेम्बर अफ कमर्सकी निर्देशक सृष्टि त्रिपाठीले गर्नुभएको थियो । ‘रिदम एण्ड सोल फेज ३’लाई साल्ट ट्रेडिङ कर्पोरेशन लिमिटेडले प्रायोजन गरेको थियो भने रियल जुस, एयर अरेबिया, सिद्धार्थ बैंक र काठमाडौं गेस्ट हाउसको सहयोग रहेको थियो ।