कलाकार सिताराम कट्टेल धुर्मुस तथा कुञ्जना घिमिरे सुन्तलीले पहिलो पटक युरोपका विभिन्न देशमा प्रस्तुति दिने भएका छन् ।
आफ्नो कलाकारिताको यात्रामा अमेरिका लगायतका अन्य देशमा पुगे पनि उनीहरु युरोपका देशमा पुगेका थिएनन् । उनीहरुले पहिलो पटक युरोपका झण्डै दर्जन बढी देशहरुमा रहेका नेपाली दर्शकलाई हँसाउँने भएका हुन् । धुर्मुश–सुन्तली साँझ कार्यक्रम अन्तर्गत पहिलो प्रस्तुति जुलाई ८ मा फिनल्याण्डमा गरिने आयोजक संस्था चौतारी इभेन्ट्सले जनाएको छ ।
त्यस्तै, दोस्रो कार्यक्रम जुलाई १३ मा माल्टामा रहने बताइएको छ । यस्तै अगस्ट ३ मा क्रोएसिया, अगस्ट ५ मा बेल्जियममा कार्यक्रमको आयोजना गरिएको आयोजकले जनाएको छ । साथै, माल्टा, स्पेन, पोल्याण्ड, जर्मनी, अस्ट्रिया, डेनमार्क लगायतका देशहरुमा कार्यक्रममा आयोजना गरिएको जानकारी दिइएको छ । धुर्मुस–सुन्तलीको साथमा गायक विष्णु खत्री, तुलसी सिवाकोटीको पनि प्रस्तुति रहने छ ।
कलाकार धुर्मुस–सुन्तली पहिलो पटक युरोपको कार्यक्रममा निस्किने तयारीमा छन् । उनीहरुले विदेशको कार्यक्रम नै पाँच वर्षपछि गर्दैछन् । उनीहरु पछिल्लो पटक बि सं २०७५ को अन्तिममा दुबईको एक कार्यक्रममा पुगेका थिए ।
‘अहिले युरोपमा रहेका नेपालीहरुलाई भेट्न पाउँदा खुसी लागेको छ । धेरैपछि विदेशी भूमिमा रहेर विभिन्न कर्म गर्नु हुने नेपाली दर्शकलाई प्रस्तुति देखाउन तयारी गर्न पाउँदा निकै खुसी लागेको छ । आयोजक टिमलाई विशेष धन्यवाद दिन्छौं,’ कलाकार धुर्मुसको भनाइ छ । त्यस्तै उनले आगामी दिनमा अन्य देशहरुमा पनि कुरा भइरहेको र अब निरन्तर कलाकारितामै सक्रिय रहने जानकारी दिएका छन् ।