रौतहटको चन्द्रपुर–२ स्थित पूर्व पश्चिम राजमार्गको लच्का नजिकै शुक्रबार यात्रुवाहक बस दुर्घटना हुँदा ३२ यात्रु घाइते भएका छन् ।
घाइते सबै खतरामुक्त रहेको प्रहरीले जानकारी दिएको छ । दुर्घटनामा बसका चालक समेत घाइते छन् ।
जनकपुरबाट वीरगन्ज तर्फ आउँदै गरेको ना ४ ख ४१२४ नम्बरको यात्रुवाहक बस राजमार्गको उत्तरतर्फ दुर्घटना हुँदा बसमा सवार ३२ जना यात्रु घाइते भएको जिल्ला ट्राफिक प्रहरी कार्यालय चन्द्रनिगाहपुरका प्रमुख सुशील आचार्यले जानकारी दिएका छन् । दुर्घटनामा परेर सर्लाही बरहथवा–४ का अकल बहादुर विक, बरहथवा–५ का रुबी बेगम र उनको छोरा मोहम्मद अली हुसेनको टाउकोमा चोट लागेको प्रहरीले जनाएको छ । रौतहटको चन्द्रपुर–१ का मानबहादुर परियार, सर्लाही हरिवन–१ का सुरज कुमार भुजेल, उनको श्रीमती रीता भुजेल र २ वर्षकी छोरी रिसुजा भुजेल घाइते भएको प्रहरीले जनाएको छ ।
धनुषा जनकपुर–७ घर भएका बसका चालक राजकुमार मण्डलको बायाँ हातमा चोट लागेको छ । उनलाई प्रहरीले नियन्त्रणमा लिइ अनुसन्धान थालेको छ । दुर्घटनामा परी घाइते ३२ जनाको चन्द्रपुर र सिभिल अस्पताल उपचार भइहेको छ । बस दुर्घटना हुनुको कारणबारे चालक मण्डलसँग सोधपुछ भइरहेको प्रहरीले जानकारी दिएको छ ।