काठमाडौँ ─ ०३ साउन २०७९
काठमाडौँ, नेपाली काँग्रेस निकट पत्रकारहरुको संगठन नेपाल प्रेस युनियनले अध्यक्ष शिव लम्सालमाथि दुर्व्यवहार गरेको भन्दै आपत्ति जनाएको छ । युनियनले बिहीबार एक विज्ञप्ती जारी गर्दै अध्यक्ष लम्सालमाथि ट्राफिक प्रहरीले मानमर्दन हुने गरी घरमै गएर दुर्व्यहार गरेको भन्दै खेद व्यक्त गरेको हो । युनियनका अध्यक्ष लम्साललाई साउन ३१ गते साँझ नयाँ बानेश्वरस्थित उनकै निजी निवासमा पुगेर ट्राफिक प्रहरीले नियोजित रुपमा दुर्व्यहार गरेको युनियनको भनाई छ । युनियनका महासचिव दिलीप पौडेलले जारी गरेको विज्ञप्तिमा भनिएको छ, ‘लम्सालको घर नजिकै रेस्टुरेन्टअघि पार्किङ गरिएका सवारी साधानले सडकमा पुर्याएको अवरोध हटाउँदा रेस्टुरेन्ट सञ्चालकको उक्साहटमा ट्राफिक प्रहरी घरमा पुगेर अपमानित हुने व्यवहार गरेको हो ।’
यस्तै युनियनले लम्सालको घरमा पुगेर व्यक्तिगत स्वतन्त्रताको हनन् गर्दै भिडियो खिचेर सामाजिक सञ्जालमा राखेर दुर्व्यवहार गरिएको भन्दै आवश्यक छानबिन गरी दोषीलाई कारबाही गर्न समेत माग गरेको छ । युनियनका अध्यक्ष लम्सालले ट्राफिक नियम उल्लंघन गरेको र कारवाही गर्न खोज्दा नेताहरुको ‘पावर’ देखाएर ट्राफिक प्रहरीलाई थर्काउन खोजेको भन्दै उनको भिडियो सामाजिक सञ्जालमा भाइरल बनाइएको थियो ।
