ताप्लेजुङ — १९ माघ २०७८
ताप्लेजुङ , ताप्लेजुङलाई चैत मसान्तसम्म कोरोना संक्रमणविरुद्धको पूर्ण खोपयुक्त जिल्ला बनाइने भएको छ । स्थानीय तहका जनप्रतिनिधि, राजनीतिक दल, संघसंस्थाका प्रमुख तथा प्रतिनिधिले यस्तो प्रतिबद्धता जनाएका हुन् । कोरोना संक्रमणविरुद्ध जिल्लाको अवस्थाका र योजनाका विषयमा सदरमुकाम फुङलिङमा आयोजित छलफल कार्यक्रममा सबैले आ-आफ्नो क्षेत्रबाट प्रयास र पहल गर्ने प्रतिबद्धता जनाएका हुन् । छलफलमा फुङलिङ नगरपालिकाका प्रमुख छत्रपति प्याकुरेल, उपप्रमुख बमबहादुर भट्टराई, पाथीभरा याङवरक गाउँपालिका अध्यक्ष केशर मेन्याङ्वो, आठराई त्रिवेणीका अध्यक्ष विश्वनाथ सिटौला, मेरिङदेनका गणेश लिम्बू र मिक्वाखोलाका रामकुमार साँवा र अन्य गाउँपालिकाका उपाध्यक्षहरु सहभागी थिए । प्रायः सबै पालिकाका स्वास्थ्य प्रमुखहरु कार्यक्रममा सहभागी थिए ।
फुङलिङ नगरपालिका–४ को वडा कार्यालयमा प्रत्येक दिन र तोक्मेडाँडा मन्दिर परिसरमा प्रत्येक हप्ताको शनिबार खोप लगाउने व्यवस्था मिलाइएको प्रमुख जिल्ला अधिकारी उमेश पाण्डेले जानकारी दिए । पालिकाका खोप केन्द्रमा भने अभियान चलाउने निर्णय भएको छ । पुस मसान्तसम्मको तथ्यांकअनुसार जिल्लाका ६४ प्रतिशतले पहिलो र ६५ प्रतिशतले दोस्रो मात्रा खोप लगाइसकेका छन् । जिल्ला स्वास्थ्य कार्यालयका अनुसार एक नगरपालिका र आठ वटा गाउँपालिका रहेको जिल्लामा फुङलिङ नगरपालिकाका ७५ प्रतिशतले पहिलो र ७६ प्रतिशतले दोस्रो मात्रा खोप लगाएको छ । गाउँपालिकामा सबैभन्दा बढी फक्ताङलुङले ७५ प्रतिशत नागरिकलाई पहिलो र ७८ प्रतिशतलाई दोस्रो मात्रा खोप लगाएको छ । सबैभन्दा कम खोप लगाउने मेरिङदेन गाउँपालिका भएको छ । यहाँका ४७ प्रतिशतले पहिलो र ५१ प्रतिशतले दोस्रो मात्रा मात्रै खोप लगाएका छन् ।
सिदिङवामा पहिलो र दोस्रो मात्रा खोप लगाउनेको संख्या समान ६३ प्रतिशत रहेको छ भने सिरिजंगामा पहिलो ७० र दोस्रो ६८ प्रतिशतले लगाएका छन् । मैवाखोलामा ५० प्रतिशतले पहिलो र ५५ प्रतिशतले दोस्रो मात्रा लगाएका छन् । मिक्वाखोलामा ५५ प्रतिशतले पहिलो र ५९ प्रतिशतले दोस्रो मात्रा लगाएको तथ्यांकमा उल्लेख छ । आठराई त्रिवेणीमा दुवै मात्रा लगाउने समान ६२ प्रतिशत छन् । पाथीभरा याङवरकमा ६० प्रतिशतले पहिलो र ६४ प्रतिशतले दोस्रो मात्रा लगाएका छन् । एक डोज मात्रै लगाए पुग्ने खोपलाई दोस्रो मात्रा मानिएकाले कतिपयमा पहिलाको तुलनामा दोस्रो मात्रा लगाउनेको संख्या बढी छ । जिल्लामा कोभिसिल्ड, एक्ट्राजेनेका, भेरोसेल, जन्सन र मोर्डना गरी पाँच प्रकारको भ्याक्सिन लगाइएको थियो ।
( कान्तिपुर दैनिक )