कञ्चनपुर — १८ माघ २०७८
कञ्चनपुर , महाकाली सिँचाइ आयोजनामा तेस्रो चरणको नहर निर्माण सुरु भएको डेढ दशकभन्दा बढी भइसक्यो । अहिलेसम्म १२.८ किमि मूल नहर मात्रै निर्माण भएको छ । आयोजनाको मुख्य समस्याका रूपमा रहेको टनकपुर बाँधदेखि नेपाल–भारत सीमासम्म मूल नहर निर्माणको काम सकिएको छ । भारतीय पक्षले नहर निर्माणको काम सकेर परीक्षणको तयारीसमेत गरेको छ । अहिलेसम्म भारतले आफ्नो भूभागतर्फ नहर निर्माण नगरे नेपालतर्फ मात्रै नहर बनाएर के गर्ने भन्ने प्रश्न उठ्ने गरेको थियो । अब भने टनकपुर बाँधबाट छाडिने पानी कहाँ उपयोग गर्ने भन्ने चिन्ता र चासो सुरु भएको छ । सबैभन्दा बढी समस्या सीमा क्षेत्रमै नेपालतर्फ २ सय २० मिटर नहर निर्माण हुन बाँकी छ । भारतले नहरमा पानी छाडे पनि यहीं रोकिने अवस्था छ । ‘अहिले परीक्षण गराएर पानी बन्द गराउनुको विकल्प छैन,’ महाकाली सिँचाइ आयोजनाअन्तर्गत तेस्रो चरणका सिनियर डिभिजनल इन्जिनियर शम्भु पण्डितले भने, ‘सबैभन्दा ठूलो कुरा भारतमा बनेको र हाम्रोतर्फ बनेको नहर जोड्न बाँकी छ । जसका कारण हामीले हाम्रोतर्फको नहरको परीक्षणसमेत गर्न सक्ने अवस्था छैन ।’
( कान्तिपुर दैनिक )