चितवन — २६ पुस २०७८
चितवन , सामान्य बेलाको जस्तै गरेर आइतबारदेखि नारायणगढको नारायणी नदी किनारमा तामझामका साथ व्यापारिक मेला ‘चितवन महोत्सव’ सुरु भएको छ । वाग्मती प्रदेशका मुख्यमन्त्री राजेन्द्र पाण्डेले उद्घाटन गरेको महोत्सव माघ ४ सम्म चल्नेछ । मंगलबारदेखि पूर्वी चितवनको रत्ननगरमा पनि यस्तै महोत्सव सुरु हुँदै छ । थारू समुदायहरूले माघीको अवसर पारेर खैरहनीमा खिचरा महोत्सव गर्दै छन् । कालिका नगरपालिकामा पनि पदमपुर महोत्सव सुरु भएको छ । हालै राप्ती नगरपालिकामा गड्यौली महोत्सव सकिएको छ । विश्वभर तीव्र गतिमा फैलिरहेको कोरोना भाइरसको नयाँ भेरिएन्ट ओमिक्रोनको संक्रमण नेपालमा पुष्टि भइसकेको छ । संक्रमण विस्तारको जोखिम उच्च रहेकै बेला जिल्लामा जारी र हुन लागेका मेला–महोत्सवले सर्वसाधारण चिन्तित छन् । माघ १ बाट देवघाटमा लाग्ने मकर स्नानको तयारी पनि तीव्र रूपमा भइरहेको छ ।
सामाजिक सञ्जालहरूमा यस्ता मेला–महोत्सव आयोजना नगर्दा राम्रो हुने स्टाटस धमाधम पोस्ट भइरहेका छन् । नारायणगढका शरदरञ्जन श्रेष्ठ लेख्छन्, ‘चितवन महोत्सव चितवनको गौरव भनेर गर्व गर्दै आएका हामी चितवनवासीहरू कोरोनाको बढ्दो संक्रमणका कारण महोत्सवमा सहभागी हुनु जोखिम बढाउनु हो । त्यसैले सकभर महोत्सव जाँदै नजानु नै उत्तम ।’ उद्योग वाणिज्य संघ चितवनले २०५३ देखि प्रत्येक २ वर्षको अन्तरालमा महोत्सव गर्दै आएको छ । जसअनुसार गतवर्ष हुनुपर्नेमा कोरोना महामारीकै कारण हुन सकेको थिएन । कोरोनाले शिथिल भएको आर्थिक गतिविधिलाई सक्रिय बनाउन महोत्सव आयोजना गरिएको संघका अध्यक्ष राजु श्रेष्ठको भनाइ छ । ‘संक्रमण नफैलियोस् भनेर हामीले महोत्सव हेर्न आउनेलाई प्रवेश टिकटसँगै निःशुल्क मास्क दिएका छौं,’ उनले भने ।
( कान्तिपुर दैनिक )