महोत्तरी — २६ पुस २०७८
महोत्तरी , नयाँ भवनमा सरेको बर्दिवास अस्पतालले विशेषज्ञसहितको प्रसूति सेवा सुरु गरेको छ । बिहान १० देखि ३ बजेसम्म ओपीडी सेवामात्रै दिँदै आएको अस्पतालले अहिले २४ सैं घण्टा इमर्जेन्सी सेवा, ल्याब सेवा, ९ देखि ३ बजेसम्म विशेषज्ञसहितको ओपीडी सेवा सुरु गरेको अस्पतालका मेसु विधानचन्द्र झाले बताए । शल्यक्रियाका लागि आवश्यक स्वास्थ्य सामग्री र औषधिहरूको व्यवस्थापन अस्पतालले गरिरहेकाले अबको एक महिनाभित्रै अप्रेसनसहितको प्रसूति सेवा र मेजर अप्रेसन पनि सुरु गरिने मेसु झाले बताए । अहिले बर्दिवास अस्पतालमा ९ जना डाक्टर, ६ स्टाफ नर्स, सीएमए ४ र एचए ३ जना छन् ।
सामान्य रोगको समेत उपचार गराउन बाहिर जाने गरेका स्थानीय अहिले अस्पतालमा भएको सुधार र थपिएका सेवासुविधाले खुसी भएका छन् । अस्पतालमा प्रसूति सेवा नहुँदा आसपासका गर्भवती जनकपुर र काठमाडौं जानुपर्ने तथा निजी स्वास्थ्य संस्थामा चर्को शुल्क तिर्नुपर्ने बाध्यतामा थिए । अस्पतालले सेवासुविधासहित बाहिरी सजावटलाई पनि व्यवस्थित गरेको छ । बर्दिवास नगरपालिकाका प्रमुख विदुर कार्कीको अगुवाइमा अस्पतालको वरपर सयौं बोटबिरुवा रोपिएका छन् । स्वास्थ्यकर्मीले नै प्रत्येक शुत्रबार अस्पताल सरसफाइ अभियान सञ्चालन गर्दै आएका छन् । अस्पतालको थप सुधारका लागि काभ्रेको धुलिखेल सामुदायिक अस्पतालले प्राविधिक सहयोग गर्ने भएको छ ।
( कान्तिपुर दैनिक )
Visited 11 times, 1 visit(s) today