रौतहट — १८ पुस २०७८
रौतहट , जिल्लाका विभिन्न बजारमा बेलाबेलामा अनुगमन हुने गर्छ । तर, अनुगमन टोली पुग्दा अधिकांश पसल बन्द हुन्छन् । अनुगमन टोली आउने जानकारी पहिले नै थाहा पाएपछि व्यवसायीले पसल बन्द गरेर भाग्दा अनुगमन हुन नै पाउँदैन । केही दिनअघि गरुडास्थित बजारमा स्थानीय प्रशासनको टोली पुग्दा व्यापारीहरू पसल बन्द गरेर लुके । उनीहरूले पहिले नै प्रशासन, राजस्व र घरेलु उद्योगको टोली अनुगमनमा आएको थाहा पाएका थिए । जिल्लाकै ठूलो व्यापारिक केन्द्र गरुडामा जिल्ला प्रशासन कार्यालयका प्रशासकीय अधिकृत प्रवल कायस्थसहितको टोली पुगेको थियो । तर, टोली पुग्नुअगावै व्यापारी धमाधम सटर झारे । एकैछिनमा बजारमा सन्नाटा छायो । अधिकृत कायस्थले अनुगमन टोलीलाई सघाउनुपर्नेमा उल्टै व्यापारीहरू पसल बन्द गरेर भागेको देख्दा अचम्म लागेको बताए । ‘हामीले व्यापारीलाई धेरै अनुरोध गरेका थियौं । पसल खोलेर टोलीलाई हेर्न र जाँच गर्न दिनुस् भन्यौं,’ उनले भने, ‘कुनै व्यापारी सम्पर्कमा आएनन् । सबै लुकें ।’
उद्योग वाणिज्य संघ गरुडाका अध्यक्ष हरेन्द्र जैसवालले कुन चिजको अनुगमन गर्न आएको हो, आफ्नो पसलसित सम्बन्धित छ/छैन भन्ने नबुझेर बन्द गर्दा समग्र व्यापारीको बेइज्जत भएको बताए । ‘टोलीले पसलको बहीखाता लैजान्छन् । दुःख दिन्छन् भन्ने व्यापारीमा एकखालको डर छ,’ उनले भने, ‘यही डरले टोली आयो भने पसल बन्द गरेर लुक्छन् ।’ अध्यक्ष जैसवालका अनुसार वाणिज्य संघले मिटिङ राखेर व्यापारीलाई सम्झाउने गरेको छ । ‘बन्द गरेर समस्या नहुने, बन्द गर्दा सिंगो व्यापारीको अपमान हुन्छ भन्दै आएका छौं, अब उपरान्त कुनै हालतमा पसल बन्द नगर्न अनुरोध गरेका छौं,’ जैसवालले भने ।
केही दिनअघि कर, स्थानीय प्रशासन, घरेलुको टोलीसहितले कार्यक्रम राखेर गरुडालगायतका बजारका व्यापारीलाई अनुगमनमा आउँदा आफ्नो पसल बन्द नगर्न र भए गरेको व्यापारको प्रगति र नियमसंगत छ/छैन देखाउन अनुरोध गरेको थियो । बन्द गरेर समस्या समाधान नहुने भन्दै सम्बन्धित निकायले व्यापारीलाई बारम्बार सम्झाउँदै आएको छ । गरुडा स्थानीय व्यापारी किशोर साहले विगतमा अनुगमनको नाममा पसलको बहीखाता सिल गरेर जाने अनि तारेखजस्तै धाउन बाध्य बनाउने गरेको गुनासो पोखे । ‘त्यसै पसल बन्द गरेर लुकेका होइनौं । केही हुँदैन भनेर सम्झाएर के गर्नु,’ उनी भन्छन्, ‘सानोतिनो कुरामा त्रुटि देखाएर दुःख दिने प्रवृत्तिका कारण सबै व्यापारी लुक्न थालेका हुन् ।’
( कान्तिपुर दैनिक )