सर्लाही — २८ मंसिर २०७८
सर्लाही , उखु काट्ने बेला भइसक्दा पनि सरकारले मूल्य तय नगर्दा सर्लाहीका चिनी उद्योगहरू सञ्चालन हुन सकेका छैनन् । उद्योग नचल्दा उखु सुक्न थालेको किसानको गुनासो छ । बर्सेनि उखु काट्ने समय सुरु भएपछि मात्रै मूल्यका लागि बहस सुरु हुने गरेका कारण किसान मारमा पर्दै आएका हुन् । कतिपयले उखु खेतमा सुकाउनुभन्दा आधा मूल्यमा सक्खर बनाउने उद्योगमा बिक्री गर्छन् । विगतमा मंसिर पहिलो सातातिर चिनी उद्योग सञ्चालनमा आउने गरेको थियो । केही वर्षयता मूल्यमा हुने किचलोका कारण उद्योगीले समयमै उद्योग चलाउने गरेका छैनन् । किसानले बढी मूल्य खोज्ने र उद्योगीले बढी नाफा खोज्ने गरेकाले पछिल्लो समय उखुको मूल्य तोक्न कठिनाइ भइरहेको छ । केही वर्षयता सरकारले मध्यस्थकर्ताको भूमिका निर्वाह गर्दै उखुको मूल्य विवाद मिलाउँदै आएको छ ।
मूल्य विवादकै कारण यस वर्ष पनि जिल्लाका चिनी उद्योग सञ्चालनमा नआएका हुन् । यता किसानलाई भने गहुँ तथा दलहन बाली लगाउन ढिलो हुने हुँदा उखु बेचेर खेत खाली गर्न हतारिएका छन् । अन्तिम खुट्टी उखु बेचेर गहुँ खेती गर्ने तयारीमा रहेका कविलासी नगरपालिका–१ पिपरियाका किसान रवीन्द्र रायले समयमै चिनी उद्योग सञ्चालनमा नआएकाले उखु बिक्री गर्न नसकिएको गुनासो पोखे । ‘अब मिल सञ्चालन भएन भने हामीले दोहोरो क्षति व्यहोर्नुपर्छ । पहिलो खेतमा भएको उखु सुक्छ, दोस्रो हिउँदे बाली लगाउन पाउँदैनौं,’ उनले भने । नेपाल उखु उत्पादक महासंघका अध्यक्ष कपिलमुनि मैनालीले उखुको मूल्यबारे सरकारले छलफलमा नै ढिलाइ गरेको बताए । कृषिमन्त्री महेन्द्र राय यादवले यस वर्षका लागि उखुको मूल्य तोक्न बल्ल छलफल अघि बढाएका छन् । मन्त्री यादवले बिहीबार किसान प्रतिनिधिहरूसँग छलफल गरेको मैनालीले जानकारी दिए ।
( कान्तिपुर दैनिक )