Fast Nepal News
Banner Below header

शक्तिपीठमा पूजा सुरु

banner single news

सुनसरी —  २२ असोज २०७८

सुनसरी , दसैं सुरु भएसँगै बिहीबारदेखि शक्तिपीठ मानिएको धरान–१४ विजयपुरस्थित दन्तकाली मन्दिरमा पूजा गर्ने र दर्शन गर्नेको भीड लाग्न थालेको छ । बडादसैंको पहिलो दिन घटस्थापनाको अवसरमा दन्तकाली मन्दिरसहित आसपासमा रहेका पिण्डेश्वर बाबाधाम, बूढासुब्बामा दर्शनार्थीको घुइँचो लागेको हो । गत वर्षको बडादसैं कोरोना महामारीको कारण खल्लो भएको थियो । धरानका सबै मठमन्दिर पूर्ण रूपमा बन्द गरिएका थिए । मन्दिर प्रवेश गर्न र भीडभाड गरेर पूजाअर्चना गर्न बन्देज लगाइएको थियो । यसपालि कोरोना संक्रमणको दर केही कम भएकाले दर्शनार्थीको संख्या बढेको पुजारी विश्वराज खनालले बताए ।

उनका अनुसार दसैं अवधिभर हरेक दिन दुर्गा भवानीको ९ वटा रूपको विशेष पूजा आराधना गरिन्छ । उनले भने, ‘दन्तकाली मन्दिर ऐतिहासिक भएकाले बडादसैंमा शक्तिपीठको रूपमा मानिन्छ ।’  उनका अनुसार घटस्थापनादेखि देवीका ९ वटा नामको रूपमा पूजा गरिने भएकाले अन्य दिनमा जस्तै भक्तजनलाई मन्दिरको मुख्य स्थलभित्र प्रवेश गर्न दिइँदैन । दशमीको बिहान विशेष पूजा सकिएपछि मात्र सर्वसाधारण भक्तजनको लागि मन्दिरको मुख्य स्थलसम्म खुला रहने खनालले बताए । हिन्दु धार्मिक ग्रन्थहरूमा उल्लेख भएअनुसार दक्ष प्रजापतिकी छोरी सतीदेवीले आराध्यदेव शिवजीसँग प्रेम विवाह गर्छिन् । तर शिवजी र सतीदेवी बीचको प्रेम विवाहप्रति दक्ष प्रजापति बेखुसी हुन्छन् ।

Inside Article Ads

उनले भव्य यज्ञको आयोजना गरेका बेला आफ्नी छोरी ज्वाइँ (शिवजी र सतीदेवी) लाई निम्तासम्म नदिएपछि सतीदेवीले आफू र आफ्ना पति शिवको अनादर गरेको ठहर गर्न पुग्छिन् । माइतीबाट भएको अनादर सहन नसकी सतीदेवीले चलिरहेको यज्ञको अग्निमा आत्मदाह गरेपछि शिवजीले रिसले ताण्डव मचाउँछन् । उनले वीरभद्रमार्फत दक्ष प्रजापतिको टाउको छिनाइदिन्छन् । पछि ब्रह्माजीले बोकाको टाउको जोडिदिएर यज्ञ विधि पूरा गर्छन् । शिवजी भने यज्ञमा आत्मदाह गरेकी सतीदेवीको मृत शरीर बोकेर घुम्नेक्रममा विभिन्न ठाउँमा सतीदेवीको अंग खस्छन् । विजयपुरमा आइपुग्दा दन्तकाली मन्दिर भएको स्थानमा सतीदेवीको माथिल्लो दाँत खसेको स्कन्द पुराणको हिमवत् खण्डमा उल्लेख छ ।    

( कान्तिपुर दैनिक )

Above Samachar
यो पनि पढ्नुस

प्रतिक्रिया

Your email address will not be published.