माले, माल्दिभ्स — २१ असोज २०७८
माले, माल्दिभ्स, साफ च्याम्पियसिप २०२१ मा बिहीबार नेपालको खेल रहेको छैन । तेस्रो खेल दिनमा नेपाल छाडेर सहभागी अन्य चार टोली मैदानमा उत्रनेछन् । यो दिनको दुई खेल नेपालका लागि उत्तिकै महत्त्वपूर्ण हुनेछ, किनभने यिनै खेलका नतिजाले प्रतियोगितामा नेपाल कहाँनिर छ र कता पुग्नेछ भनेर निर्धारण गर्नेछ । यस्तोमा यी दुवै खेलप्रति नेपालको नजर हुनेछ । विशेषतः नेपालका प्रशिक्षक अब्दुल्लाह अल्मुताइरीको छड्के नजर हुनेछ । बिहीबार पहिलो खेलमा भारतले श्रीलंकाको सामना गर्नेछ । अर्को खेलमा डिफेन्डिङ च्याम्पियन तथा आयोजक माल्दिभ्सले बंगलादेशविरुद्ध खेल्नेछ । राउन्ड रोबिनका आधारमा चलेको प्रतियोगितामा नेपाल भने शीर्षस्थानमा छ । नेपालको दुई खेलबाट ६ अंक छ । नेपालले दुवै खेल जितेर सानदार सुरुआत लिएको छ । ‘म्याच डे थ्री’ को नतिजा जस्तै भए पनि खाली बंगलादेशसँग मात्र नेपाललाई उछिन्ने अवसर हुनेछ ।
त्यसैले उनी मान्छन्, भारतविरुद्धको खेलमा श्रीलंकन खेलाडी अझ आत्मविश्वासी र सुदृढ भएर मैदान उत्रनेछन् र भारतलाई सक्दो दुःख दिने प्रयास गर्नेछन् । भारतलाई थाहा छ, दुई खेल हारेको श्रीलंका घाइते बाघजस्तै भएको छ । यसले तेर्स्याउने चुनौती पक्कै चानचुने हुने छैन । भारतका प्रशिक्षक इगोर स्टिमेक भन्छन्, ‘श्रीलंकाको सामना गर्नु पक्कै पनि सजिलो हुनेछैन । हाम्रो खेल रणनीति भने पूरा ३ अंक बटुल्ने हुनेछ, हामी फेरि अंक गुमाउन सक्ने स्थितिमा छैनौं ।’ यसबीच सबै परिस्थिति नेपाली प्रशिक्षक अल्मुताइरीले मालेबाट १० किलोमिटर टाढा रहेको ब्यान्डोस टापुबाट सूक्ष्म निरीक्षण गरिरहेका छन् । उनले प्रत्येक पलको घटनाबारे सूक्ष्म अध्ययन गरिरहेका छन् । उनले अघिल्लो प्रतिस्पर्धा सकिएलगत्तै बोलेका थिए, ‘म्याच डे थ्री’ मा पक्कै केही आश्चर्यजनक नतिजा आउन सक्नेछ । सोझो अर्थमा भन्दा बिहीबारका खेलको नतिजा नेपालको पक्षमा होस् भन्ने नै हो, जुन शतप्रतिशत स्वाभाविक पनि छ ।
( कान्तिपुर दैनिक )