चलचित्र ‘नम्बरी सुन’ले चलचित्र हेर्ने १२ जना दर्शकलाई सुन उपहार दिने घोषणा गरेको छ ।
ललितपुरस्थित झम्सिखेलमा सोमवार चलचित्र युनिटले गरेको पत्रकार सम्मेलनमा फिल्मका प्रस्तुतकर्ता नारायण खातीले १२ जना दर्शकलाई चलचित्रका तर्फबाट सुन उपहार दिने घोषणा गरेका हुन् ।
निर्माता खातीले खल्ती एपबाट चलचित्र ‘नम्बरी सुन’ को टिकट काट्ने ५ जना तथा त्यसभन्दा बाहिरका ७ जनालाई दर्शकलाई सुनको मोतीवाला चन्द्रहार प्रदान गर्ने घोषणा गरेका हुन् । उनले त्यो उपहार लक्की ड्रमार्फत सार्वजनिक गरिने खुलाएका छन् ।चलचित्रका प्रस्तुतकर्ता खाती पेशाले सुन व्यवसायी हुन् ।
चलचित्रका निर्देशक राजु गिरिले चलचित्रले झण्डै ७० वर्ष अघि घर–घर पुगेर सुनको गहना बनाउनेको कथालाई प्रस्तुत गर्ने बताएका छन् । ‘अहिलेका दर्शकले मन पराउने फ्लेवरको माया प्रेम, सेन्टिमेन्टल र कमेडी शैली फिल्ममा छ’, उनले भने ।
फिल्मकी अभिनेत्री नम्रता सापकोटाले फिल्ममा आफूले प्रेम प्राप्त गर्न संघर्षरत ग्रामीण युवतीको भूमिका निर्वाह गरेको बताइन् । ‘अहिलेसम्म मैले गरेका फिल्मभन्दा केही फरक काम ‘नम्बरी सुन’ मा छ’, उनले भनिन् ।
चिलचित्र आगामी साउन २५ गतेदेखि प्रदर्शनमा आउने भएको छ ।