डायमण्ड जोशी
वैशाख १८,जाजरकोट
छेडागाड नगरपालिका–११ मा एक पुरुषको हत्यामा संलग्न भएको आरोपमा बाबु छोरा पक्राउ परेका छन् । हत्या आरोपमा छेडागाड–९, राजीकोटका सुकिलाल वादी र उनका छोरा ज्ञानु बादीलाई प्रहरीले पक्राउ गरेको हो ।
छेडागाड–११, भैंसीखर्कस्थित फुम्न–राजीकोट जोड्ने झोलंगे पुलमाथि गत आइतबार छेडागाड–१०, खलटाकुराका ४६ वर्षीय धनवीरे पुन मगरको लास फेला परेको थियो ।
गोप्य सूचनाका आधारमा अनुसन्धान गर्दै जाँदा बादीका दुवै बाबु छोरालाई पुनको हत्यामा संलग्नता रहेको तथ्यसहित पक्राउ गरेको प्रहरी नायब उपरीक्षक मधुकुमार थापाले बताए । अदालतबाट सात दिनको म्याद लिएर पुन मगरको हत्या सम्बन्धमा सुकिलाल र ज्ञानुलाई प्रहरी हिरासतमा राखेर थप अनुसन्धान भइरहेको थापाले बताए ।
प्रारम्भिक अनुसन्धानको बयानमा दुवै जनाले पुन मगरको हत्या अपराध स्वीकार गरेको उनको भनाइ छ । हत्या कारण खुल्न नसकेको उनले बताए ।