क्लिभल्यान्ड — आश्विन १५, २०७७।
अमेरिकी राष्ट्रपतीय निर्वाचनका लागि भएको बहसमा राष्ट्रपतिका उम्मेदवारद्वय डोनाल्ड ट्रम्प र जोन बाइडेन आरोप–प्रत्यारोपमा उत्रेका छन् ।
नोभेम्बर ३ मा हुने चुनावका प्रतिस्पर्धीबीच बुधबार पहिलोपटक प्रत्यक्ष बहस भएको हो । बहसका क्रममा वर्तमान राष्ट्रपति ट्रम्पले बारम्बार आफ्ना प्रतिस्पर्धी तथा पूर्वउपराष्ट्रपति बाइडेनलाई अवरोध पुर्याएका थिए ।
ट्रम्पको प्रस्तुति फितलो र अमर्यादित भएको भन्दै कपितयले टिप्पणी गरेका छन् । बाइडेनको प्रस्तुति भने भद्र र सकारात्मक भएको जनाइएको छ ।
विषेशगरी कोरोना भाइरस, अमेरिकी अर्थतन्त्र, रोजगारी, स्वास्थ्य सेवा, सर्वोच्च अदालतमा न्यायाधीश नियुक्ति, अन्तर्राष्ट्रिय राजनीतिलगायतका विषयमा बहस केन्द्रित भएको थियो । १५/१५ मिनेटको समय दिएर ६ भागमा प्रस्तुत गरिएको बहसमा विभिन्न विषयवस्तुहरु उठान गरिएको हो ।
राष्ट्रपति ट्रम्पले कर छलेको दाबीसहित समाचार सार्वजनिक भएका बेला चुनावी बहस भएको हो । बाइडेनले भने नियमअनुसार कर चुक्ता गरेका विवरणहरु सार्वजनिक गरिसकेका छन् ।
लामो समयदेखि धनाढ्य व्यवसायीका रूपमा मानिएका ट्रम्पले सन् २०१६ मा ७५० डलर मात्र आयकर तिरेको समाचार हालै सार्वजनिक भएको छ । समाचारमा उल्लेख गरिएको छ । तर बहसका क्रममा राष्ट्रपति ट्रम्पले आफूले करोडौं डलर कर तिरेको दाबी गरेका थिए ।
कर छलीसँगै कोरोना भाइरसबाट उत्पन्न महामारी नियन्त्रणमा प्रभावकारी भूमिका खेल्न नसकेको भन्दै ट्रम्पको आलोचना हुँदै आएको छ । आफूमाथि आरोप आइरहेका बेला उनले उक्त आरोप बाइडेनतिर तेर्साएका थिए । बाइडेनले लामो समय विभिन्न जिम्मेवारी पाएर पनि प्रभावकारी काम गर्न नसकेको ट्रम्पको दाबी छ ।
‘तपाईंले ४७ वर्षमा गरेको भन्दा धेरै काम मैले ४७ महिनामा गरेको छु,’ ट्रम्पले बाइडेनलाई जवाफ दिँदै भनेका छन् । ट्रम्पको यो जवाफलाई उनका समर्थकहरुले बढी महत्त्व दिएर प्रचार गरेका छन् ।
‘अमेरिकीहरुले अहिले पनि धेरै समस्याहरु झेलेका छन्, ती समस्याहरु बाइडेनले झन्डै आधा शताब्दी सार्वजनिक जिम्मेवारी सम्हाल्दा देखिका हुन्, उहाँले त्यसलाई समाधान गर्न कुनै सफलता हासिल गरेको देखिएको छैन, त्योभन्दा बढी त मैले छोटो समयमा गरेको छु,,’ ट्रम्पको दाबी छ ।
बहसका क्रममा ट्रम्पले आफ्नो ठाउँमा बाइडेन भएको भए अमेरिकामा भाइरसका कारण अझ धेरै मानिसले ज्यान गुमाउने दाबी गरे ।
बाइडेनले भने कोरोना भाइरसको महामारी नियन्त्रण गर्न ट्रम्पले कुनै योगदान गर्न नसकेको र अर्थतन्त्र सुधार तथा बचाउका लागि कुनै योजना नरहेको दाबी गरे । उनले राज्य मूकदर्शक भएको र व्यवसायीहरुलाई राहत नदिएको टिप्पणी गरे । मास्क प्रयोगको विषयलाई पनि ट्रम्पले गलत रूपले प्रस्तुत गरेको बाइडेनको भनाइ छ ।
बहसमा बाइडेन निकै कम मात्रै बोलेका थिए । उनी बोलिरहेको समयमा पनि ट्रम्पले पटक–पटक हस्तक्षेप गर्दै जवाफ दिने तथा खण्डन गर्ने गरेका थिए । अमेरिकाले कोरोनाबाट मृत्यु भएकाहरुको सही तथ्यांक सार्वजनिक गरेको तर भारत, रुस, चीनलगायत देशहरुले झूटा विवरण सार्वजनिक गरेको दाबी गरे । ट्रम्पका कतिपय दाबीलाई बाइडेनले हाँसेर हल्का बनाइदिएका थिए ।
कोरोना भाइरसको त्रासका कारण बहस प्रसारण गरिएको स्टुडियोमा यसपटक निकै थोरै मानिस मात्र सहभागी गराइएको थियो । बहस सुरु गर्नुअघि हात मिलाउने प्रचलन भए पनि यसपटक भने भाइरसकै कारणले दुई प्रतिस्पर्धीले हात मिलाएका थिएनन् ।
अमेरिकामा राष्ट्रपतीय निर्वाचनका लागि प्रतिस्पर्धामा रहेका उम्मेदवारलाई सँगै राखेर प्रत्यक्ष बहस गराउने प्रचलन लामो समयदेखि चल्दै आएको छ । टेलिभिजनहरुबाट प्रत्यक्ष प्रसारण गरिने यस्तो बहसका आधारमा मतदाताले मतदानका लागि निर्णय लिने भएकाले यसलाई महत्वका साथ हेर्ने गरिन्छ ।
(कान्तिपुर दैनिक)