इन्द्रेणी
घाम-पानी सँगै पर्दा
लाग्छ इन्द्रेणी
माला लगाऊँ भन्दा भन्दै
हराइजान्छ नि ।
इन्द्रेणीलाई सात रङ्गले
कति सुहाएको
किन फेरि हेर्दा हेर्दै
हराई गएको ।
वल्लो खोला पल्लो खोला
इन्द्रेणीले छुन्छ
हेर्दा खेरि रङ्ग बिरङ्गको
माला जस्तो हुन्छ।
उफ्री उफ्री नानीहरू
हेर्दै रमाउँछ
सात रङ्गे मालाले यो
दिलै समाउँछ ।
घाम-पानी पर्दाखेरी
इन्द्रेणी लाग्छ
घामलाई मात्र देख्दा
डराइ भाग्छ ।
~~~~~~
२.
चिसो पानी
चिसो चिसो पानी
पिउनु हुन्न नानी
सधैँ तातो पानी पिउने
बसाल है बानी।
चिसो पानी पिउँदा खेरि
घाँटी दुख्न सक्छ
घाँटी दुखेपछि भित्र
घाउ भइ पाक्छ ।
नदेखिने किराकिरी
पानीमा नै हुन्छन्
पेटभित्र किरा पसे
रोग धेरै लाग्छन् ।
उमाली देऊ पानीलाई
किराकिरी मर्छ
रोग लाग्ने संभावना
पर परै टर्छ ।
सधैँ भन्छु नानीबाबू
पानी चिसो नपिउनु
उमालेकाे पानी खाई
स्वस्थ भइ जिउनु ।
~~~~~~
(दार्जिलिङ, भारत निवासी विमला प्रधान जाेशी कवि, लेखिका तथा समीक्षक हुनुहुन्छ । सुप्रसिद्ध साहित्यकार पारसमणि प्रधानकी नातिनी उहाँका दुईवटा कृति प्रकाशित छन् । यी कविता उनकाे प्रकाशाेन्मूख बालकविता सङ्ग्रहबाट लिइएको हाे ।)